Charla sobre normalización lingüística coa maxistrada Dalila Dopazo Blanco

O xoves 8 de maio visitou o noso centro Dalila Dopazo Blanco, xuíza do Xulgado do Social Nº3 de Lugo, que nos falou do proceso de normalización da lingua galega a través dos séculos, facendo un percorrido vital e exemplificando as dificultades polas que o galego pasou dende que existe como lingua diferenciada da latina.

O alumnado do centro puido escoitar de primeira man as agresións que sufriron e sofren tanto o idioma coma os seus falantes e ser así consciente do dano que produce nunha comunidade lingüística a existencia de estereotipos e prexuízos.

Mencía Rodríguez, recoñecida coa Mención de Honra no concurso "Rosalía sempre Viva"

A nosa alumna Mencía Rodríguez, de 4º ESO, foi recoñecida coa Mención de Honra no concurso de recitado "Rosalía sempre Viva", que acolleu a Casa-Museo Manuel María de Outeiro de Rei o pasado 22 de marzo. Mencía púxolle voz ao poema "A gaita gallega", de Rosalía de Castro. 

 Aquí vos deixamos a súa interpretación:

 

Cando as palabras emocionan

As palabras teñen un poder infinito, chegan ao corazón, e así o demostraron o pasado 22 de marzo os nosos estudantes Mencía Rodríguez, de 4º ESO, e Darío López, de 1º BAC, no concurso de recitado "Rosalía sempre Viva" de Outeiro de Rei. Para o evento, acollido na Casa-Museo Manuel María, Mencía escolleu "A gaita gallega", de Rosalía de Castro, poema co que foi recoñecida con Mención de Honra, e Darío recitou "A auga é inocente", de Manuel María.

Mencía e Darío participaron na quenda de tarde entre unha trintena de estudantes de Secundaria chegados dende diferentes puntos das provincias de Lugo, A Coruña e Pontevedra. Xunto ao apoio de familiares, o alumnado do IES Poeta Díaz Castro tamén estivo arroupado polas profesoras Susana López e Eva Teixeiro, dos departamentos de Lingua Galega e Lingua Castelá, respectivamente. Pola mañá, as voces de Primaria foron as protagonistas. 

Moitos parabéns! Agardamos seguir gozando da emoción das vosas palabras!

Presentación do libro O pracer da chuvia, de Manuel Vázquez

O 9 de decembro visitounos Manuel Vázquez para falarnos da súa novela O pracer da chuvia, unha obra na que reivindica o mundo da aldea e do rural como cerna das nosas raíces, mais que tamén ten carácter urbano representado por diferentes cidades, entre elas Lugo ou Lisboa. 

O alumnado de 1º de bacharelato e de FPBásica puido coñecer de primeira man cales foron as inquedanzas que levaron o autor a escribir un libro co que moitos se sentiron identificados.

Skam en Guitiriz

O 18 de maio, durante a semana das Letras Galegas, recibimos a visita da creadora de contido dixital en galego Malva (@todomal.va), nunha actividade titulada "Skam en Guitiriz". Partindo da súa experiencia como galegofalante e neofalante, Malva transitou por conceptos como o autoodio ou a necesidade de atoparmos referentes na nosa lingua para normalizala. Falamos de música, series, contas de tik tok, youtubeir@s... E preguntámonos, do mesmo xeito que a serie noruega Skam, que temáticas e formatos nos gustaría ver e consumir en lingua galega. Porque todo pode estar en galego, no aquí e no agora... E se non existe, creámolo! Grazas por vir subirnos a autoestima lingüística, Malva! Queres saber máis dela? Visita esta páxina

Hai lingua despois do 17 de maio

Mensaxe da nosa querida profe Alba María: "Aquí vai o tema do 18 de maio, o día despois do Día das Letras Galegas, onde o galego segue existindo. Para todes vós, falantes, e en especial para o profesorado e alumnado de Lingua e Literatura Galegas". ENTRA AQUÍ!

FALAR ESTA FALA

Neste Día das Letras Galegas 2022, o alumnado de 1º da ESO do IES Poeta Díaz Castro ten unha mensaxe para todas e todos vós!