Froitos da colaboración!

 Froitos da colaboración! IX Festa da Torta de Millo

O primeiro domingo do mes de xuño celebrouse a IX edición da Festa da Torta de Millo de Guitiriz. 

Un ano máis, a colaboración entre a Biblioteca municipal e os centros de ensino do concello guitiricense fíxose palpable a través de diversidade de actividades, entre elas, e coma o ano pasado, a convocatoria, para o alumnado do IES Poeta Díaz Castro, do concurso de carteis sobre a torta. Estes carteis foron a base para a creación de marcapáxinas, agasallo do Concello aos compradores da sobremesa. Na elaboración dos marcapáxinas participou o alumnado da aula CEMIT e os usuarios do Centro de Día. Aquí están os froitos!

   

      

    

Correlingua 2026

 Correlingua 2026

Un ano máis as e os “poetas” participamos nunha nova edición do Correlingua. Coma sempre visitamos e percorremos a milenaria muralla de Lugo e cantamos e bailamos festexando a nosa lingua, pois como reza o lema deste ano: “Co galego no corazón, facemos revolución”.

                              

                                                  

 Descubrindo a Begoña Caamaño

Celebramos as Letras, coñecemos pasado e forxamos futuro da man da autora homenaxeada este ano 2026 co Día das Letras Galegas. Guiadas polos cartaces fixemos unha viaxe polo percorrido vital de Begoña Caamaño e pola súa obra, que coñecemos un pouco mellor mergullándonos en diferentes publicacións que atopamos pola rede. 

 Roteiro literario Aire negro, Terra Chá

Este ano, despois de lermos a obra de Agustín Fernández Paz nas aulas, tivemos o privilexio de sermos convidados a facer o roteiro literario que desenvolve o profesorado e alumnado do IES Basanta Silva. Descubrimos onde se agocha a Gran Besta e os lugares misteriosos e fascinantes que Laura, a protagonista, percorreu pola Chaira. Grazas polo convite, un pracer!

       

                                                                                                

 Visita ao Museo Pepe de Pígara

A finais da segunda avaliación o alumnado de 1ºESO visitou o Museo Pepe de Pígara, en Guitiriz. Este día de convivencia serviu para que a rapazada puidese coñecer de primeira man o noso pasado e practicar algúns xogos da infancia de antano. Ademais, colaboramos facendo a tradución á nosa lingua do tríptico informativo do Museo. Xuntos facemos comunidade!

Grazas por todo, Pepe!

        

    

Autores guitiricenses

 Autores guitiricenses

O 17 de abril tivemos unha visita moi especial no IES, a de Alfonso Blanco Torrado e Manuel Castro Santamariña, ambos vencellados á Asociación Cultural Xermolos desde o seu nacemento aló polo ano 1977. Faláronnos de toponimia e lendas próximas e da última novela de Manuel Castro, A noite que se foi a luz, publicada en 2025 e que o noso alumnado de 4ºESO tivo o pracer de ler. 

Agradecidos e agardando por un novo encontro!

 

Facemos comunidade!

Facemos comunidade!

O noso alumnado esparexeu a literatura de diferentes formas e por diferentes puntos do concello, entre eles os colexios, a onde levou a lectura e a escrita; ou a Biblioteca Municipal, onde a rapazada participou activamente na creación de textos para diversos concursos literarios: “O paraugas da fala”, “Tes un conto...” e aquí vemos algúns deses froitos da colaboración. Xuntos facemos comunidade!